Euskarazko 24 ikastaro eskainiko dituzte EHUko uda ikastaroetan

Euskal Herriko Unibertsitateko XXXVI. Uda Ikastaroek 15 ziklo izango dituzte, eta horietan 137 ikastaro, tailer, eskola eta jardunaldi profesional egingo dira, eta horietako 24 euskaraz egingo dira, bi frantsesez eta 20 ingelesez (biltzar zientifikoak, gehienbat). Gainera, 20 biltzar, bost jarduera ireki eta 20 on line ikastaro egingo dira (azken horiek orte osoaren zehar). Ikastaroak ekainaren 7an hasi eta irailaren 15ean amaituko dira.

Matrikula egiteko epea aurreko astean hasi zen. Prezioa murriztua izango da maiatzaren 31ra arte, bai publiko orokorrarentzat (%15), bai talde jakinentzat (ikasleak, erretiratuak, langabeak, familia ugariak); azken kasu horretan, murrizketa %50ekoa izango da.

Programaren zeharkako ildo nagusiak hauek izango dira: hezkuntza XXI. mendeko eskaeren aurrean, Europako eta nazioarteko dimentsioa, energia eredu berriak eta ingurumena babestea, aro digitalak hainbat sektoretan duen eragina, herritarrak zahartzearen aurka dituzten estrategiak, gobernantzaren dimentsio berria...

Uda Ikastaroek «gero eta presentzia zabalagoa» dute Euskal Autonomia Erkidegoan (EAE) eta Akitanian, «gizarteari hurbiltzeko helburuari esker». Horrela, Gipuzkoan, ikastaroak Miramar jauregian egiteaz gain, Zubietan, Irungo Oiasso museoan, Getarian eta Oñatin ere egingo dira. Gainera, Uda Ikastaroen presentzia finkatu egingo da Bizkaian eta Araban: 19 jarduera egingo dira Bizkaian (Bizkaia Aretoan eta Arratian), eta Araban, berriz, 12 (Gasteizen, Agurainen eta Guardian).

• Temas
• Zurekin Bizkaia
• Zurekin Araba